يوميات مصطفى وشروق (سلسله فضه(الحلقه الحاديه عشر

]

[/url]

(الحلقه الحادية عشر)

وقفنا عند مكالمه فجائيه من هيثم لمصطفى قاله فيها انه عايزه ضروري
بيـــــــنا نشوف هيحصل ايه النهارد

======================
ومصطفى يسيب شغلة ويروح لهيثم

مصطفى : فية اية يا هيثم

هيثم : فاكر لما اتكلمت معاك امبارح

وقولنا اننا نشوف امورنا ونظبط علشان نخلى فرحنا الاسبوع الجاى مع بعض

مصطفى : اة يا هيثم بس دة مكنش كلام اكيد

دة مجرد اقتراح بينا وبين بعض

هيثم : اة فعلا انت كلمت شروق فى الموضوع الاول ؟؟

مصطفى : لاء لسة كنت هكلم واقولك نتقابل احنا الاربعة ونتفق كلنا مرة واحدة

هيثم : اة طيب المهم

انا كنت بكلم راندا وكنت بقولها اية رأيك وكدة

فهى فرحت جدا

مصطفى : طيب فين المشكلة ؟؟

هيثم : المشكلة بقى

انت عارف ان راندا ومرام اصحاب وتقريبا كلامهم كتير مع بعض

مصطفى : اة

هيثم : المهم راندا مخدتش بالها وكانت بتتكلم مرام وقالتلها ان احتمال فرحها يكون

الاسبوع الجاى

وقالتلها ان فرحها وفرح مصطفى وشروق هيكون مع بعض

ومرام مستحملتش الخبر دة

مرام تعبانة اوى يا مصطفى ومحتاجلك بجد

بص يا صاحبى

انا عارف ان مرام بتحبك جدا وانك كمان بتحبها جدا

بس اللى انا طالبة منك انك تحاول تاخد بأيديها

بس اوعى تجرح شروق

لان شروق عمرك ما هتلاقى زيها

مصطفى : طيب خلاص انا هروحلها

مصطفى فى سرة وهو فى الطريق ...

اية يا مرام

انتى لية بتصعبيها عليا

انا بحبك ومش سهل عليا انا كمان اننا نسيب بعض

بس قدرنا مش واحد !!

ويروح لمرام

مصطفى : اذيك يا مرام

مرام : الف مبروك يا مصطفى

مصطفى : الله يبارك فيكى يا مرام

مرام انتى لية بتعملى فيا وفى نفسك كدة

مرام : علشان انا مش مستحملة انى اشوفك مش ليا

انا غلطت غلطة عمرى يا مصطفى

ونفسى اصلحها ومش قادرة

نفسى تسامحنى يا مصطفى

مصطفى : انا مش زعلان منك فى اى حاجة

بس علشان خاطرى متصعبيهاش عليا

قوميلنا بالسلامة

وحاولى تحبى خطيبك علشان شكلو بيحبك اوى

تعرفى

الحياة بتبقى حلوة لما تكون مع انسان بيحبنا بجد

مرام : بس هتكون احلى لو احنا الاتنين بنحب بعض

مصطفى : عندك حق

بس دة قدرنا

متضيعيش خطيبك منك يا مرام

متضيعهوش منك

ومصطفى يسيبها ويمشى ....

مرام فى سرها

بالسهولة دى يا مصطفى

بس تعرف

جايز يكون عندك حق

انا غلط ولازم ادفع تمن غلطتى

انا كنت انانية معاك

شروق اداتك كل حاجة وانا عمرى ما فكرت اديك اى حاجة

بحبك بس انانيتى مخلكش تشوف حبى دة

شروق عمرها ما كانت انانية

وصدقنى يا مصطفى انا اتعلمت الدرس

علشان كدة انا مش هفكر فى نفسى تانى

ومش هجرح خطيبى

هحاول احبو بس مقدرش اوعدك انى هنساك

وتفتح مرام شنطتها علشان تجيب منديل تمسح بية دموعها ويطلع فى ايديها ورقة مكتوب فيها

( بحبك وهفضل احبك لاخر عمرى ووعدى ليكى انى عمرى ما هسيبك تضيعى منى )

ومرام دموعها تزيد...

ياة ..

فاكر يا مصطفى الورقة اللى انت كتبتهالى دى

وفاكر الوعد اللى انت وعدتهولى

بس احيانا الوعد بيبقى مش اكتر من مجرد كلمة !!

ومرام تخرج من المستشفى ...

وتكلم خطيبها ..

خطيبها : اية يا مرام عاملة اية دلوقتى

مرام : انا كويسة الحمد لله

خطيبها : على فكرة انا كنت لسة هكلمك دلوقتى

مرام : لية فية حاجة ؟؟

خطيبها : اة بصى

انا عمرى ما هقدر اغصبك على حاجة انتى مش عيزاها

علشان كدة عمرى ما هقدر اخليكى تحبينى غصب عنك

وانا عمرى ما حسيت انك بتحبينى يا مرام

علشان كدة كنت هكلمك علشان نسيب بعض

مرام : لا لا انا بحبك

انا بس الايام اللى فاتت دى كنت تعبانة بس

وتعرف انا كنت بكلمك لية ؟؟

خطيبها : لية ؟؟

مرام : انت مش كنت عايز تعمل فرحنا من بدرى وانا كنت بأجلة

خطيبها : اة

مرام : انا موافقة نعملة فى اى وقت حتى لو انت عايزة بكرة

خطيبها : اية بتقولى اية ؟؟؟

مرام : بقول انا اسفة على كل اللى انت حسيتة منى الفترة اللى فاتت

وعيزاك تسامحنى وصدقنى بكرة مش هعمل اى حاجة فى الدنيا دى غير انى اخليك اسعد انسان فى الدنيا

خطيبها : هو مين معايا ؟؟

مرام : انا مرام حبيبتك

خطيبها : لا لا انتى مش مرام انتى بتضحكى عليا

ومرام تضحك وخطيبها يضحك

مرام : شايف الضحكة اللى انت بتضحكها دى

ربنا يقدرنى واخلى ضحكتك دى متسبكش طول عمرك

ويقفلوا مع بعض ...

وشروق تكلم مصطفى

شروق : وحشتنى يا مصطفى

مصطفى : وانتى وحشتينى

شروق : طيب يا حبيبى عايزاك فى موضوع كدة

مصطفى : قولى

شروق : انا هخلص شغلى بكرة وهعدى على صحبتى اقعد معاها شوية

مصطفى : لا يا شروق مينفعش احنا اتكلمنا فى الموضوع دة كتير

شروق انا زعلت منك كذا مرة قبل كدة لانك لما بتروحى فى حتة بتتاخرى ومبتخديش بالك

علشان كدة مش هديكى فرصة تتأخرى تانى

يا شروق انا برفض مش علشان عايز اخنقك كل الموضوع انى خايف عليكى

شروق : يا حبيبى عارفة بس بكرة بس

مصطفى : لاء لو عايزة تروحيلها استأذنى بدرى من الشغل وروحى البيت فى ميعاد شغلك مش هقولك حاجة

شروق : بس !!

مصطفى : مفيش بس

خلصى شغلك وروحى علطول

شروق : حاضر !!

ويخشوا يناموا ومصطفى يروح شغلة

ويكلم هيثم ...

مصطفى : اية يا هيثم بقولك اية عدى عليا على الشغل النهاردة

علشان نتمشى شوية

علشان انا مخنوق شوية ومحتاج اتمشى بدل قاعدة القهوة دى

هيثم : طيب خلاص

ويتقابلوا ..

وهما ماشيين ..

هيثم : اية بقى مالك

مصطفى : مفيش مخنوق شوية من موضوع مرام دة

ومصطفى يسكت

ومصطفى يشوف شروق قدام بيت صاحبتها

ومصطفى يتصل بشروق ..

مصطفى : الو

شروق : اية يا مصطفى

مصطفى : انتى فين يا شروق ؟؟

شروق : انا انا

مصطفى : انتى فين يا شروق ؟؟

شروق : انا

انا فى البيت !!

شروق : اقصد مروحة البيت يا مصطفى

معلش انا متلغبطة شوية بس

ولما هروح هحكيلك

وشروق تشوف مصطفى ...

وتروحلة ..

وهيثم يسيبهم ويمشى ..

شروق : مصطفى انا اسفة بس والله هشرحلك

مصطفى : هتشرحيلى اية انك كدبتى ؟؟

شروق : والله انا ما كدبت عليك

يا مصطفى انت كل حاجة ليا فى حياتى ومقدرش اكدب عليك

مصطفى : انا مش قولتلك متروحيش لصاحبتك علشان انتى بتنسى نفسك وبتتاخرى

شروق : عارفة والله

مصطفى : وامال اية اللى حصل دة ؟؟

شروق : بص كل الموضوع انى كنت هاخد حاجات من صاحبتى دى

فخلصنا شغل وقولت اروح اخدها منها واروح علطول

بص فى ساعتك هتلاقيها دة ميعاد خروجى من الشغل

والله يا مصطفى انا مارضيت اطلع معاها حتى شقتها

علشان اسمع الكلام اللى انت قولتهولى

مصطفى : وقولتيلى لية انك فى البيت ؟؟

شروق : والله معرفش بس انا اتلغبطت

خفت اقولك انا عند صاحبتى باخد منها حاجة فانت تفهم غلط وتزعل

صدقنى مقدرتش افكر ساعتها فى حاجة

وانت شفت اهو بعديها لما فكرت قولتلك ووالله قولتلك قبل ما اشوفك

انا اسفة يا مصطفى

بس عايزة اقولك حاجة

انا عمرى ما هيجى اليوم فى حياتى اللى اكدب عليك فية

مصطفى انت تعرف

انت حلم انا طول عمرى بحلمة

وكنا اخوات وعمرى ما كدبت عليك فى حاجة

تفتكر لما احقق حلمى هكدب عليك

ربنا يعلم انا ببقى عايزة اشوف علطول نظرة الفرح فى عنيك

تتوقع هيجى اليوم اللى هخلي فى عنيك نظرة حزن

ومصطفى يسكت

مصطفى : طيب يا انسة يللا نروح

شروق : انت لسة زعلان منى ؟؟

ومصطفى ميردش

شروق : مصطفى هسألك سؤال

هو انتى مش بتحبنى ؟؟

مصطفى : اكيد بحبك

شروق : يعنى ليا خاطر عندك ؟؟

مصطفى : اكيد طبعا

شروق : طيب ممكن علشان خاطرى متزعلش بقى

وصدقنى بعد كدة مش هتشوف حاجة تضايقك منى

مصطفى : طيب خلاص يا شروق

شروق : بجد

مصطفى : بجد

شروق : والله بحبك ومليش حد فى الدنيا غيرك

اقولك على حاجة يا مصطفى

مصطفى : قولى

شروق : انا بقيت عايشة فى الدنيا دى مش شايفة ولا حاسة غير بيك

وانت معايا ببقى ناسية الدنيا كلها ومببقاش خايفة من اى حاجة

وانت مش معايا ببقى لابسة السلسلة وحاسة بيك جمبى

وبمشى مش بخاف برضة من اى حاجة

حاسة معاك بالامان وبالحب والحنان

حاسة اجمل احساس بجد

ساعات بعمل حاجات بتزعلك يا مصطفى

بس مببقاش قاصدى

صدقنى نفسى اعمل كل حاجة تفرحك

تعرف

لما اتاخرت فى يوم وانا بجيب لبس وروحت وشوفت انى ضايقت وانى قلقتك عليا اوى كدة

انا قعدت اعيط والوم نفسى ومعرفتش انام يوميها

وقعدت افكر اية اللى يخليك فرحان

مصطفى مش عايزاك تزعل منى فى اى حاجة لانك عندى كل حاجة

وتمر الايام

مصطفى يكلم هيثم ...

مصطفى : بقولك اية النهاردة بعد الشغل هات راندا وانا هجيب شروق ونقعد مع بعض بقى

علشان نشوف ميعاد يناسبنا كلنا

ونخلى اهلنا يتكلموا على الاساس دة

هيثم : طيب فل

وكلهم يتقابلوا ويقعدوا مع بعض ...

مصطفى : طبعا يا جماعة انا امى بتزن عليا ونفسها تفرح بيا

وهيثم نفس الموضوع والدتى ووالدة هيثم نفسهم يكون فرحنا امبارح قبل النهاردة

فعلشان كدة احنا هنتفق مع بعض ميعاد يناسبنا كلنا ونبلغ بية اهلنا ونشوف ردهم برضة

ويتكلموا يتقفوا مع بعض ان الفرح الاسبوع اللى بعد الجاى ...

ومصطفى يبلغ والدتة وتفرح جدا وتكلم والدة شروق وهى كمان توافق

وهيثم يكلم والدتة وتوافق ويتفقوا هما ووالدة راندا

مصطفى يكلم شروق ..

مصطفى : الف مبروك يا عروسة

كلها الاسبوع اللى بعد الجاى وهتبقى معايا طول عمرى كلة

شروق : انا بجد مش مصدقة يا مصطفى

معقول الاسبوع اللى بعد الجاى هتبقى معايا العمر كلة

مصطفى : اة معقول يا حبيبتى

ويقفل معاها ويلاقى هيثم بيكلمة ..

هيثم : اية يا مصطفى هتيجى بكرة ؟؟

مصطفى : فين ؟؟

هيثم : فرح مرام بكرة

مصطفى : اية دة بكرة ؟؟

هيثم : اة بكرة وهى بعتتلك دعوتك مع راندا كمان

مصطفى : لا يا هيثم خلاص مش هروح

ربنا يوفقها فى حياتها

مش هروح علشان مفكرهاش بجرحها وربنا يتمملها على خير

ويخش ينام ويصحى يروح شغلة ويخلص شغلة ويتمشى لوحدة

مصطفى فى سرة

ربنا يوفقك يا مرام فى حياتك

ويوفقنى مع شروق

جايز انا وانتى يا مرام كنا عايزين بعض

بس للاسف نصيبنا مش فى بعض

قدرنا مش واحد

عموما انا فرحانلك بجد لان خطيبك انسان كويس

وهيقدر يحافظ عليكى

وانا مبتمناش من ربنا غير انك تفضلى كويسة وربنا يسعدك

ومصطفى يلاقى نفسة قدام فرح مرام

هو انا جيت لية

طب انا قاصد اجى ولا جيت من غير ما اخد بالى

انا مش عارف حاجة !

بس اللى اعرفة انى نفسى اشوف مرام من بعيد لبعيد وامشى

ومصطفى يشوف مرام من بعيد ويدعيلها ان ربنا يوفقها فى حياتها

ويروح ..

وتمر الايام ..

وشروق تكلم مصطفى ..

شروق : انا مش مصدقة نفسى يا مصطفى بجد

معقول بكرة فرحنا !!

معقول هتبقى معايا طول العمر

مصطفى : والله يا شروق متتصوريش انا فرحان ازاى

شروق : طيب يا حبيبى بقولك اية انا هنزل اجيب شوية حاجات كدة واجى علطول

مصطفى : طيب يا شروق بس متتاخريش وانا كمان هعمل شوية حاجات كدة علشان ابقى جاهز بكرة

وهكلم كام عيل صاحبى كدة اخليهم يظبطوا عربياتهم علشان يزفونا

شروق : طيب يا حبيبى

مصطفى : شروق متتأخريش انا نبهت عليكى اهو تانى

شروق : خلاص يا حبيبى متقلقش

ويقفلوا مع بعض ..

يمر الوقت وشروق تبتدى تتأخر ومصطفى يكلمها متردش علية ..

مصطفى فى سرة

تانى يا شروق مبترديش يابنتى والله خايف عليكى

ربنا يستر

ومصطفى يلاقى موبايله بيرن ..

شروق : الحقنى يا مصطفى

الحقنى !!

يــــــــا ترى حصــــــل ايه !!!!؟

نعرف الحلقه الجــــــايه

استنــــــــونـــــــــا

هيثم

الله يستر
راح نشوف شو صار معهم

» يوميات مصطفى وشروق (سلسله فضه(الحلقه السادسه
» يوميات مصطفى وشروق (سلسله فضه(الحلقه الثامنه
» يوميات مصطفى وشروق (سلسله فضه(الحلقه العاشره