يوميات مصطفى وشروق (سلسله فضه(الحلقه الثامنه

]

[/url]

(الحلقه الثامنه)

وقفنا على حاجه مهمه هيقولها مصطفى لشروق
بيـــــــنا نشــــــوف
======================

مصطفى : بصى يا شروق انا هقولك حاجة مهمة

انا لما بقولك متتأخريش دة علشان انا خايف ليكى

مش علشان انا بقيدك ولا علشان عايز اضايقك

فالمفروض لما اقولك حاجة زى دى تلتزمى بيها

شروق : يا حبيبى والله انا عارفة

وخلاص مش هتأخر تانى

فك بقى

مصطفى : طيب خلاص

شروق : ايوة كدة اهو الواحد يعرف ينام مرتاح

ويناموا ..

ويصحى مصطفى الصبح علشان يروح الشغل ..

ويكلم والدتة ..

مصطفى : ماما صحيح كنت عايز اسألك فى حاجة

والدتة : اية يا حبيبى فى اية

مصطفى : بشوفك انتى ووالدة شروق بتتكلموا كتير كدة ولما بخش عليكو

بتسكتو وبتغيروا الموضوع

والدتة : لا يا حبيبى ولا حاجة

مصطفى : على ابنك برضة دى عينيكى باينة اوى ان فيها حاجة

قولى قولى

والدتة : انا هسألك سؤال الاول

انت مش ناوى تتجوز يابنى

مصطفى : لا ناوى يا ماما بس لسة مظبطش امورى ومش هينفع اتقدم لحد

الا لما اعرف امورى بالظبط ماشية ازاى

والدتة : طب انت حاطط عينك على حد

مصطفى : اة فهمت بقى

هى شروق حاكية لمامتها واكيد مامتها قالتلك

والدتة : اة جت منها ومجتش منك

مش لما يكون فية حاجة زى دى تيجى تقولى

مصطفى : والله كنت هقولك فعلا بس مجتش فرصة

والدتة : طيب يا حبيبى شد حيلك علشان نفسى اشوفك عريس

مصطفى : اية رأيك فى شروق يا ماما

والدتة : واحنا هنلاقى احسن منهم يا مصطفى

اهلها ناس طيبين ونعرفهم

ومامتها اعرفها اكتر من اى حد دى عشرة سنين

وشروق مؤدبة وانا اللى مربياها على ايدى

انا كان نفسى من زمان تكون دى اللى تختارها يا مصطفى

انا فرحانة بجد انك اخترت شروق

مصطفى : ايوة هو دة اهم حاجة عندى

رضاكى يا ست الكل

ومصطفى يبوس ايديها ..

وينزل يروح الشغل

ويدخل مكتبة ..

ويلاقى مرام داخلة علية ...

مرام : اذيك يا مصطفى

مصطفى : انا كويس

انتى عاملة اية

مرام :انا الحمد لله

انا قولت اسال عليك احنا برضة كنا اصحاب فى يوم من الايام

مصطفى : اة اكيد طبعا

مرام : طيب خد دة

مصطفى : اية دة ؟؟

مرام : دة دعوة خطوبتى

لازم تكون انت اول واحد تحضرة يا مصطفى

احنا مهما كان زمايل فى الشغل برضة ..

مصطفى : اة طبعا

هاجى ان شاء الله

ويخلص مصطفى شغلة ويقابل هيثم ..

هيثم : عرفت ان فرح مرام بكرة ؟؟

مصطفى : اة انت عرفت منين ؟؟

هيثم : مفيش جت لراندا وادتها دعوتين واحدة ليا وواحدة ليها

مصطفى : اة ما اهى جاتنى وادتنى دعوتى بنفسها

هيثم : طب انت هتروح

مصطفى : اة هروح

هيثم : لية يا مصطفى

مصطفى : هروح يا هيثم

انا لو مجتش هتفرح وهتفكر انى لسة مضايق

ودة اللى هى عايزاة

وانا عمرى ما هديها الفرصة دى

مرام عايزة تجرحنى يا هيثم

مرام عايزة تجرحنى !!

هيثم : طيب خلاص بكرة نتقابل ونروح كلنا

ومصطفى يروح ...

ويكلم شروق ..

شروق : هتروح فرح مرام بكرة يا مصطفى ؟؟

مصطفى : وانتى عرفتى منين ان فرحها بكرة ؟؟

شروق : مرام كلمتنى وقالتلى انها اديتك دعوة وانك هتروح

وقالتلى انها مردتش تديك دعوتى

علشان تكلمنى وتدعينى بنفسها

وقالتلى معلش فى اللى عملتة معاكى اخر مرة

هتروح يا مصطفى ؟؟

مصطفى : اة هروح انا وهيثم وراندا

هتيجى ؟؟

شروق : لا مش هاجى

مش هقدر ابص فى وشها بعد اللى قالتة اخر مرة

روح انت يا مصطفى لوحدك

ويقفلوا مع بعض ..

شروق فى سرها ...

عارفة انك مجروح دلوقتى يا مصطفى

علشان كدة مش قادرة اقولك حاجة

ودموع شروق تنزل ..

عارفة ان اللحظة دى مش سهلة عندك

مهما كان

بس كان فية ايام بينكم

بس انا هحاول على قد ما اقدر انى اعوضك عن كل حاجة جرحتك فى حياتك

علشان كدة نفسى اخرجك من اللى انت فية دة بس مش عارفة

ويناموا ويروح مصطفى الفرح ...

مصطفى : راندا عاملة اية

مصطفى : انا كويسة

انت عامل اية

مصطفى : تمام الحمد لله

راندا فى سرها ...

نفسى اعرف يا مرام عملتى لية كدة

شكلك باين عليكى انك مش فرحانة

ومصطفى اكتر منك

الموضوع اتقفل وكنا قربنا ننساة

لية بتفتحية من جديد يا مرام

لية بس !!

ومصطفى فى سرة ..

لا انا مش مضايق

لا انا بتضحك على نفسى انا مضايق

طيب حاول تدارى علشان محدش ياخد بالة

هو انت مش بتحب شروق

لا طبعا اكيد بحبها

والله شروق دى اللى معوضانى عن حاجات كتير

ربنا يخليها ليا

بس مش عارف لية مش قادر استحمل اشوف مرام كدة

مش عارف

هيثم : مصطفى

يا مصطفى

يا مصطفى !!

مصطفى : اية يا هيثم

هيثم : بطل سرحان وفك علشان شكلك ميبنش عليك

مصطفى : بقولك اية يللا نروح نسلم على العريس والعروسة ونمشى

علشان مش طايق اقعد هنا اكتر من كدة

هيثم : طيب يللا

ويروحوا يسلمو على العريس والعروسة

ويمشى مصطفى

ووراة انسانة كانت هتبقى لية فى يوم من الايام

( فالقلوب تريد والقدر يتحكم )

هيثم : تعالى نوصل راندا ونروح نقعد انا وانت على اى قهوة شوية

مصطفى : لا لا معلش يا هيثم روح انت وراندا

وانا هروح عايز ابقى لوحدى شوية

ومصطفى يروح ....

هيثم : ياريت مصطفى ما كان جية

راندا : لا يا هيثم بالعكس كدة احسن

على الاقل علشان مرام متحسش انها كسرتة

هيثم : دة كان باين علية اوى يا راندا ومقدرش يدارى حاجة

راندا : لاء متهيألك دة بس علشان انت عارف الموضوع

ثم مرام كان باين عليها اكتر منة

مرام كانت فاكرة ان لما تديلو دعوة فرحها كدة هتجرحة

متعرفش انها كدة جرحت نفسها !!

ومصطفى يكلم شروق ...

مصطفى : انا وانا جاى شوفتك واقفة فى البلكونة وبتعيطى يا شروق

شروق : انا لاء يا مصطفى

مصطفى : شروق متضحكيش على نفسك

شروق انا بحبك ومبحبش غيرك

شروق : والله عارفة يا مصطفى

متشغلش باللك انت بس

المهم روحت

مصطفى : اة روحت انا وهيثم وراندا

شروق : طيب ربنا يتمملهم على خير

ويقفلوا مع بعض ...

مصطفى فى سرة ...

عارف يا شروق انى جرحتك

بس والله غصب عنى

ومكنتش قاصد اجرحك

انا حسيت دة اوى دلوقتى لما شفت دموعك وكلامك فى التيلفون

بس اوعدك بكرة يا شروق هتسمعى خبر ينسيكى كل اللى انا عملتة فيكى دلوقتى

وشروق تنام من كتر العياط وهى ماسكة السلسلة

مصطفى يصحى من النوم يكلم مامتة

مصطفى : ماما كنت عايزك فى موضوع

ماما : اية يا حبيبى فية اية

مصطفى : مش عايزة تفرحى بيا ؟؟

ماما : اكيد طبعا

مصطفى : طيب اية رأيك تكلمى مامة شروق ونعمل خطوبة بس دلوقتى

لحد ما امورى تظبط وساعتها نتجوز

ماما : اة يا مصطفى دة كويس وان شاء الله لما ربنا يكرمك تبقوا تتجوزوا

ولا مامة شروق هترفض ولا باباها

دول يتمنوا يا حبيبى

وتبان علامات الفرح على وش والدة مصطفى

ماما : طيب يا مصطفى روح شغلك بقى وانا هروح اكلمها دلوقتى وافاتحها فى الموضوع

ويروح مصطفى شغلة ..

وفى اثناء شغل مصطفى تروح والدتة لوالدة شروق ..

والدة مصطفى : بصى بقى يا ام شروق انا عايزة اخد شروق لمصطفى ابنى

والدة شروق تسكت ...

ووالدة مصطفى تبتدى على وشها علامات الاستغراب

والدة مصطفى : انتى مش موافقة

والدة شروق : والله مش كدة

بس

والدة مصطفى : بس اية ؟؟

والدة شروق : شروق من فترة قريبة تعبت

وفى اثناء واحنا بنعملها التحاليل والفحوصات اكتشفنا انها عندها عيب خلقى

ومبتخلفش

وانا وابوها مخبيين عليها ومش قايلنلها لحد دلوقتى

والدة مصطفى : مبتخلفش

والدة شروق : بصى يا ام مصطفى احنا اكتر من اخوات واكتر من اهل

وعمرنا ما نرفض مصطفى لاى سبب كان

لاننا مش هنلاقى احسن منكوا

بس فى نفس الوقت منقدرش نخدعكم

اعرضى الموضوع على مصطفى وهستنى منكوا الرد

وصدقينى حتى لو انتوا موفقتوش علاقاتنا مش هتتأثر علشان دة حقكم

وترجع والدة مصطفى البيت وهى زعلانة وحيرانة ..

مصطفى فى الشغل يدخل علية محمد زميلة ..

محمد : مش هتروح لمرام زميلتنا ؟؟

مصطفى : لية مالها ؟؟

محمد : بيقولوا بعد ما خلصت فرحها امبارح

جالها هبوط فى الدورة الدموية ونقلوها المستشفى

مصطفى : انت بتتكلم جد ؟؟

محمد : اة والله

مصطفى : طيب ادينى عنوان المستشفى بسرعة ..

ويروح مصطفى يزور مرام ...

ويلاقى خطيب مرام

خطيب مرام : مش انت صاحب مرام فى الشغل

مصطفى : اة هى عاملة اية دلوقتى

خطيب مرام : تعبانة اوى بس مش عارف مالها

ويخش مصطفى لمرام ..

ومرام تشوفة وتستغرب .....

مصطفى : اية يا مرام عاملة اية دلوقتى

مرام : احسن الحمد لله

مصطفى : طيب يلا شدى حيلك وقوميلنا بالسلامة

مرام فى سرها ...

اية دة

انت يا مصطفى اللى جايلى بنفسك

انا مش مصدقة نفسى

انا بقيت كويسة يا مصطفى

بقيت كويسة

مصطفى : طيب استأذن انا بقى وهبقى اجى اشوفك بكرة يا مرام وان شاء الله تكونى احسن من الاول

ويروح مصطفى البيت ويشوف والدتة زعلانة ..

مصطفى : مالك يا ماما فى اية ؟؟

والدتة : نفسى اشوفك متجوز وعندك عيل افرح بية

مصطفى : هو انتى مروحتيش لوالدة شروق ؟؟

والدتة : روحتيلها

مصطفى : طب وامال فية اية بقى

ما انا بكرة اتجوز واجيبلك عيل تفرحة بية اهو

ولا

هما موفقوش ؟؟

والدتة : لاء يا ابنى وافقوا

بس

مصطفى : بس اية يا ماما قلقتينى

والدتة : شروق مبتخلفش يابنى

مصطفى : اية يا ماما

مبتخلفش !!!!!؟؟؟

يــا ترى ايه رد فعل مصطفى بعد ما عرف!!!؟
هل هيصرف نظر عن شروق بعد الخبر اللي صدمه ده !!؟
ولا هيتمسك بيها !؟؟

نعرف الحلقه الجــــــايه

استنــــــــونـــــــــا

يسلمو ايديك هيثم

» يوميات مصطفى وشروق (سلسله فضه(الحلقه السادسه
» يوميات مصطفى وشروق (سلسله فضه(الحلقه التاسعه
» يوميات مصطفى وشروق (سلسله فضه(الحلقه الحاديه عشر